უამინდობის შედეგად აჭარაში ჩაიხერგა სასოფლო გზები, დაზიანდა ხიდები. ქარიშხალმა სახურავი გადახადა რამდენიმე სახლს. მეწყრული პროცესები ქობულეთში ისევ გააქტიურდა. მიწის მასა სხვადასხვა სოფელში რამდენიმე სახლთან ჩამოწვა. მეწყერის ხუთი შემთხვევა დაფიქსირდა ხელვაჩაურში. საავტომობილო მიმოსვლა შეწყდა სოფელ ზედა ჯოჭოში. ცენტრალურ გზას მოწყდა ზედა თხილნარი.
პრობლემებს ებრძვიან ბათუმშიც. დაიტბორა რამდენიმე ქუჩა. წაიქცა მაგნოლიის ხე და დაზიანდა საგზაო ინფრასტრუქტურა. 2 ათასამდე აბონენტს ჩაქვის სათაო ნაგებობაზე შექმნილი პრობლემის გამო შეუწყდა სასმელი წყლის მიწოდება.
მეწყერი ჩამოწვა ქედის 10 სოფელშიც. წვიმამ ოთხ საცხოვრებელს შეუქმნა პრობლემა შუახევში. ხუთი სოფლის მიმართულებით შეწყდა საავტომობილო მიმოსვლა ხულოში. ამ დროისთვის მოძრაობა ყველა მიმართულებით აღდგენილია. სოფელ ჩაოს გზის დაზიანების გამო, აჭარის საგზაო დეპარტამენტმა ალტერნატიული გზის გაყვანა დაიწყო.
დღის განმავლობაში აჭარის მასშტაბით რამდენიმე ასეულ აბონენტს შეუწყდა ელექტროენერგია. ხულოში უშუქობის გამო სამ საბავშვო ბაღში შეწყდა სააღმზრდელო პროცესი.