თბილისში, ქინძმარაულის ქუჩაზე გაზგასამართი სადგურის ტერიტორიაზე მომხდარი აფეთქების შედეგად დაშავებული ორი პირი ხეჩინაშვილის სახელობის საუნივერსიტეტო კლინიკის დამწვრობის ცენტრი გადაიყვანეს. კლინიკის ინფორმაციით, ერთი პაციენტი ამ დრომდე საავადმყოფოში რჩება, მეორე კი უკვე გაწერეს.
„ჩვენთან აფეთქების შედეგად დაშავებული ორი პაციენტი შემოიყვანეს. ერთი უკვე გავწერეთ, მეორე კი საავადმყოფოში რჩება. მდგომაროება რთულია, უფრო დეტალურ ინფორმაციას მოგვიანებით მოგაწვდით", - განუცხადა პირველ არხს გუგა ქაშიბაძემ.
აფეთქების შედეგად სამი ადამიანი დაშავდა. ერთ-ერთი მათგანი, რომელიც მსუბუქად დაშავდა, შემთხვევის დეტალებს იხსენებს.
„უცბად მოხდა აფეთქება, წნევა დაეცა და ერთ კომპრესორი აფეთქდა. სამი ადამიანი ვიყავით ერთად ოთახში, მე შიგნით მყოფებს ვეხმარებოდი“,- განუცხადა ჟურნალისტებს ერთ-ერთმა დაშავებულმა.
თბილისში, ქინძმარაულის ქუჩაზე გაზგასამართი სადგურის ტერიტორიაზე აფეთქება მოხდა. აფეთქებამ ხანძარი გამოიწვია.
როგორც პირველ არხს საგანგებო სიტუაციების მართვის სააგენტოში განუცხადეს, ადგილზე ხუთი სახანძრო-სამაშველო ბრიგადა მუშაობდა. მათივე ცნობით, ცეცხლი ამ დროისთვის ლიკვიდირებულია.