10-თვიანი პოლიტიკური პროცესის დასასრული - ქვეყანას ახალი კონსტიტუცია აქვს. ხმაურიანი განხილვის შემდეგ პარლამენტმა 110-ი ხმით პრეზიდენტის მოტივირებული შენიშვნები დაძლია.
გიორგი მარგველაშვილის 6-პუნქტიან შენიშვნებს მხოლოდ რვა დეპუტატმა დაუჭირა მხარი.
ვეტოს დაძლევის შემდეგ საკონსტიტუციო ცვლილებების თავდაპირველ ვერსიას ხელმეორედ უყარეს კენჭი - შედეგები ასეთია: 117 მომხრე, 7 წინააღმდეგი.
კენჭისყრაში ოპოზიციის ნაწილს მონაწილეობა არ მიუღია.
მანამდე დარბაზში მწვავე დებატები გაიმართა. საპარლამენტო ოპოზიციის მსგავსად საკონსტიტუციო რეფორმას ერთპარტიულ დოკუმენტად აფასებს პრეზიდენტის ადმინისტრაციაც, რომელიც მმართველ გუნდს დოკუმენტის საკუთარ თავზე მორგებაში ადანაშაულებს.
გიორგი აბაშიშვილის ამ განცხადებას პარლამენტის თავმჯდომარის მწვავე პასუხი მოჰყვა. ირაკლი კობახიძემ პრეზიდენტის ადმინისტრაციის ხელმძღვანელს საკუთარი უფლებამოსილება კიდევ ერთხელ შეახსენა.