შეერთებული შტატების საელჩომ თურქეთში არასაიმიგრაციო ვიზების გაცემა შეაჩერა.
ამის მიზეზი თურქეთის სასამართლოს მიერ საკონსულოს თანამშრომლის, მეთინ თოფუზისთვის თავისუფლების აღკვეთის შეფარდება გახდა, რის გამოც აშშ-ის ხელისუფლება ღრმა შეშფოთებას გამოთქვამს და მათი თანამშრომლის წინააღმდეგ წაყენებულ ბრალდებას დაუსაბუთებლად მიიჩნევს. საელჩოში აცხადებენ, რომ აღნიშნული ქმედება ძირს უთხრის თურქეთთან ხანგრძლივ პარტნიორულ ურთიერთობებს.
„ბოლო დროს განვითარებულმა მოვლენებმა აიძულა შეერთებული შტატების ხელისუფლება, გადახედოს თურქეთის ხელისუფლების ვალდებულებების საკითხს, აშშ-ის დიპლომატიური მისიებისა და მისი პერსონალის უსაფრთხოებასთან მიმართებით. იმისათვის, რომ მინიმუმამდე დავიყვანოთ სტუმრების სია ჩვენს საელჩოებსა და საკონსულოებში, ვაჩერებთ ყველა არასაიმიგრაციო სავიზო მომსახურებას“, - წერია სოციალურ ქსელ „ტვიტერში“ გავრცელებულ განცხადებაში.
თურქეთის სასამართლომ მეთინ თოუზს, ფეთჰულა გიულენის ორგანიზაციასთან კავშირის ბრალდებით, თავისუფლების აღკვეთა შეუფარდა. მას ჯაშუშობაში, კონსტიტუციური წყობის დარღვევისა და ხელისუფლების დამხობის მცდელობაში ედება ბრალი.