ამერიკის შეერთებული შტატების ვიცე-პრეზიდენტმა პროტესტის ნიშნად სტადიონი დატოვა.
Reuters-ის ცნობით, ინციდენტი მაიკ პენსის მშობლიურ შტატში, ინდიანაპოლისის სტადიონზე მოხდა, სადაც პენსი ინდიანაპოლის “კოლტსისა” და სან-ფრანცისკო “ფორტი ნაინერსის” თამაშს ესწრებოდა.
როგორც მოგვიანებით ვიცე-პრეზიდენტმა მიკრობლოგ “ტვიტერში” განმარტა, მისი წამოსვლის მიზეზი სამხედროების, ქვეყნის დროშისა და ჰიმნის მიმართ ის უპატივცემულობა იყო, რომელიც ფეხბურთელებმა ჰიმნის შესრულების დროს გამოიჩინეს.
სახელმწიფო ჰიმნის შესრულების დროს, სან-ფრანცისკოს მოთამაშეთა ნაწილმა მუხლი მოიყარა, პოლიციის მიერ რასობრივი ნიშნით ძალის გადამეტების პროტესტის ნიშნად. კოლტსის მოთამაშეთა ნაწილს კი შავი ფერის მაისური ეცვა, წინა მხარეს წარწერით “ჩვენ”, რომელიც უკანა მხარეს გრძელდებოდა შემდეგი სიტყვებით: “მხარს ვუჭერთ თანასწორობას, სამართლიანობას, ერთიანობას, პატივისცემას, დიალოგს, შესაძლებლობებს”.
მომხდარს “ტვიტერში” გამოეხმაურა პრეზიდენტი. დონალდ ტრამპი წერს, რომ ის ამაყობს მაიკ პენსითა და მისი მეუღლით, რომელთაც თავად სთხოვა წამოსულიყვნენ, იმ შემთხვევაში, თუ მოთამაშეები უპატივცემულობას გამოავლენდნენ.
პრეზიდენტი მოუწოდებს ფეხბურთის ეროვნულ ლიგას მოთამაშეებს დისკვალიფიკაცია მიანიჭოს.
პროტესტის მსგავსი ფორმით გამოხატვის უფლება შეერთებული შტატების კონსტიტუციაში პირველი შესწორების დროს არის განმტკიცებული.