კომპანია „ალბატროსის“ თანამშრომლები დაცვის თანამშრომლების სამსახურიდან გათავისუფლებას ითხოვენ. კომპანიის თანამშრომლების ნაწილი ოფისთან საპროტესტო აქციას მართავს და ხელმძღვანელობისგან მათ მოთხოვნაზე პასუხს ელოდება. მათი განცხადებით, „ალბატროსის“ დაცვის თანამშრომლები პერიოდულად მათზე ახდენენ ზეწოლას, მათ შორის ფიზიკურს. მათი თქმით ერთ-ერთი ესეთი შემთხვევა გუშინ მოხდა, როდესაც დირექტორის კაბინეტიდან გამოსვლის შემდეგ დაცვის თანამშრომლებმა სცემეს.

ასევე, მათი თქმით, მსგავსი ფაქტი მოხდა 4 ოქტომბერსაც, როდესაც დაცვის რამდენიმე თანამშრომელმა კომპანიის 3 თანამშრომელს სცემა. მათი თქმით, ისინი კომპანიის წარმომადგენელთან ლევან კერვალიშვილთან მართავდნენ შეხვედრას. საკითხი ეხებოდა შეცდომით დარიცხულ თანხას და ასევე საბუღალტრო გადარიცხვებს. კომპანიის წარმომადგენლების თქმით, ინციდენტი სწორედ ამ შეხვედრის შემდეგ მოხდა.

კომპანიის ადმინისტრაციის ხელმძღვანელი უარყოფს დაცვის თანამშრომლების მიერ კომპანიის თანამშრომლების ცემას. რაც შეეხება გუშინდელ შემთხვევას, ადმინისტრაციის ხელმძღვანელის მადინა თვაურის თქმით, გუშინ კომპანიის ორ თანამშრომელს შორის მოხდა დაპირისპირება, მათი გაშველების პროცესში კი ჩაერთო დაცვის სამსახური და ასევე, საპატრულო პოლიციაც გამოიძახეს. კომპანიის ადმინისტრაციაში აცხადებენ, რომ ერთ-ერთი პირი - ტექნიკური სამსახურის წარმომადგენელი, ვისთანაც კომპანიის სხვა თანამშრომელს დაპირისპირება მოუხდა, ამჟამად კლინიკაში მკურნალობს.

აქციის მონაწილეებს შეხვდა კომპანია „ალბატროსის“ დამფუძნებელი ზაზა ჩხაიძე. ჩხაიძე აცხადებს, რომ ამ ეტაპზე, გამოძიება მიმდინარეობს და ვიდრე არ დადგინდება, ვისი ბრალეულობა იყო, არც ერთი თანამშრომლის გათავისუფლებას არ გეგმავს. ზაზა ჩხაიძის თქმით, ინციდენტების თავიდან აცილების მიზნით, დაცვის იმ თანამშრომლებს გაარიდებენ, რომლებზეც კომპანიის წარმომადგენლები საუბრობენ.

აქციაზე იმყოფებიან პროფკავშირების წარმომადგენლებიც, რომლებიც კომპანიის დამფუძნებლებს ხვდებიან.