შეუძლებელია, ყველა ტელევიზიაში მიხვიდე და გამართო დებატები, ამიტომ, ვიფიქრეთ, რომ იქნებ შეიქმნას საერთო პლატფორმა - ამის შესახებ „ქართული ოცნების“ დედაქალაქის მერობის კანდიდატმა კახა კალაძემ ჟურნალისტებთან თემის კომენტირებისას საუბრისას განაცხადა.
„მე მაქვს ჩემი პროგრამა მაქვს დაგეგმილი ყოველდღიური შეხვედრები მოსახლეობასთან და ამასთანავე ყველა ტელევიზია ითხოვს მერობის კანდიდატების დებატებში. შეუძლებელია, ყველა ტელევიზიაში მიხვიდე და გამართო დებატები. ჯერ ერთი, არ არის საინტერესო ერთი და იგივე თემაზე ერთი და იგივე დებატები განხორციელდეს, მეორე, როცა ერთ ტელევიზიაში მიხვალ და მეორეში არ მიხვალ, შეიძლება ვინმეს აწყენინო. ამიტომ, ვიფიქრეთ, რომ იქნებ შეიქმნას საერთო პლატფორმა.
შეიძლება, რომელიმე ტელევიზია, შეიძლება საერთოდ ნეიტრალურ ტერიტორიაზე, შეიძლება არასამთავრობო ორგანიზაციები ჩავრთოთ და დაგვეხმარონ იმაში, რომ ყველა ტელევიზიის ჟურნალისტს და წარმომადგენელს ჰქონდეს შესაძლებლობა, მოვიდეს დასვას ის შეკითხვა, რომელიც მას აინტერესებს და იყოს ყველა მერობის კანდიდატი წარმოდგენილი. ამით არავის ვაწყენინებთ და ყველა მერობის კანდიდატიც იქნება“, - განაცხადა კალაძემ და აღნიშნა, რომ თუკი ტელევიზიები ვერ შეთანხმდებიან, შემდგომ კვლავ იფიქრებენ ამ თემაზე.