პირველი არხის ახალი შენობის დიზაინს ირჩევ შენ - 1tv.ge-ზე პირველი არხის ახალი შენობის არქიტექტურული პროექტის შესარჩევად ხმის მიცემა დაიწყო.

8 აგვისტოს პირველმა არხმა არქიტექტურული და მასთან დაკავშირებული მომსახურების შესყიდვაზე კონკურსი გამოაცხადა. კონკურსში მონაწილეობის სურვილი სამმა კომპანიამ: შპს BWC, შპს „თბილქალაქპროექტი“ და შპს „არტსტუდიო-პროექტი“ გამოთქვა. მათ შორის საუკეთესო არქიტექტურული პროექტის დიზაინს საზოგადოება ხმის მიცემის საშუალებით შეარჩევს.

ხმის მიცემა ყოველ 12 საათში ერთხელ, „ფეისბუქის“ საშუალებით, პირველი არხის ვებგვერდზე 1tv.ge-ზეა შესაძლებელი.

„მენეჯმენტის გადაწყვეტილებით, გამარჯვებულს პირველად გამოავლენს ხალხი. შენობა აშენდება იმ დიზაინით, რომელიც ყველაზე მეტ ხმას მიიღებს. ეს არის ჩვენი ქვეყნის ისტორიაში ძალიან მნიშვნელოვანი მოვლენა, რადგანაც თავის დროზე ეს შენობა იყო ძალიან მნიშვნელოვანი სიახლის და ავანგარდის შემომტანი. ახლაც ასე იქნება. ეს პირველი არხია, საზოგადოებას ეკუთვნის და მასვე უნდა მივანდოთ გადაწყვეტილება. პროცესში თითოეული ადამიანის ჩართულობა მნიშვნელოვანია“, - განაცხადა პირველი არხის გენერალურმა დირექტორმა ვასილ მაღლაფერიძემ.

პირველი არხის ვებგვერდზე დეტალურად შეძლებთ სამივე არქიტექტურული პროექტის დათვალიერებას, რომელთაგან ერთი გახდება გამარჯვებული.

პროექტების სანახავად და სასურველისთვის ხმის მისაცემად მიჰყევით ბმულს - 1tv.ge