ოპოზიცია საკრებულოს გუშინდელ გადაწყვეტილებას აპროტესტებს. „ევროპული საქართველოს“ წარმომადგენლებმა და მერობის კანდიდატმა ბრიფინგი თაბორის მთაზე, სწორედ იმ ადგილზე გამართეს, რომელთან დაკავშირებითაც თვითმმართველმა ორგანომ გადაწყვეტილება მიიღო.
პარტიის წევრები აცხადებენ, რომ ტერიტორიის კერძო საკუთრებაში გადაცემა იგეგმება და ამაზე მეტყველებს ისიც, რომ ტერიტორია უკვე შემოღობილია. პარტიის წევრები საპროტესტო აქციის გამართვას გეგმავენ.
საპროტესტო აქციებს აანონსებენ და უკმაყოფილებას გამოთქვამენ „ნაციონალურ მოძრაობაშიც“. პარტიაში მიმდინარე პროცესს ბიძინა ივანიშვილის ინტერესებს უკავშირებენ.
დედაქალაქის საკრებულოს გუშინდელ ხმაურიან სხდომას დავით ნარმანიაც გამოეხმაურა. თბილისის მერი ოპონენტებს საკუთარი პოზიციის მშვიდად დაფიქსირებისკენ მოუწოდებს და აცხადებს, რომ საკრებულომ გადაწყვეტილება ქალაქის ინტერესებიდან გამომდინარე მიიღო.
თბილისის საკრებულოს გუშინდელი გადაწყვეტილებით, თაბორის მთისა და პუშკინის სკვერის მიმდებარედ ტერიტორიის ნაწილს ზონალური სტატუსი შეეცვალა.
საკრებულოს გადაწყვეტილებას წინ უძღვოდა ხმაური და დაპირისპირება. ოპოზიციური პარტიების წარმომადგენლები სხდომის გადადებას ითხოვდნენ.