დათა ახალაიას საქმის სანდრო გირგვლიანის ეპიზოდზე სასამართლოს დღეს ჩვენება მისცა ლევან ჭელიძემ. მოწმის თქმით, ის გირგვლიანების ოჯახის ახლობელია. როგორც ჭელიძემ სხდომაზე განაცხადა, მასთან მივიდა ყაზბეგის ყოფილი გამგებელი გოდერძი მარსაგიშვილი და სთხოვა, ირინა ენუქიძესთვის მილიონი ლარი შეეთავაზებინა, რათა სანდრო გირგვლიანის დედას პოლიტიკურ პარტიებთან კონტაქტი გაეწყვიტა.
"მივედი ირინასთან, მისი მამა და მეუღლეც იქ იყვნენ. ცოტა ხანს მისმინა და მითხრა, არ უნდა მოსულიყავი ამ წინადადებითო. მითხარი, ვინ შემოგთავაზა ესო და მე სანამ ცოცხალი ვიქნები არ ვიტყვი, რომ შენ მოხვედიო. მერე იმ საღამოსვე, "იმედის" ეთერით გამოვიდა და თქვა იგივე, რაც მე ვუთხარი. მე ჩემს მკვდარ შვილს არ ვყიდიო, იმიტომ მოვედი ტელევიზიაში, რომ მეორედ აღარ შემაწუხოთო.", - აღნიშნა მოწმემ.
ჭელიძის თქმით, ირინა ენუქიძეს უთხრა, რომ გოდერძი მარსაგიშვილის თხოვნით მივიდა მასთან. თუმცა ლევან ჭელიძის განცხადებით, თავად მარსაგიშვილს ვინ დაავალა ოჯახთან შეთანხმება, მისთვის ცნობილი არ არის.