გაერთიანებული სამეფოს პრემიერმინისტრმა, ევროკავშირის ლიდერებს სთხოვა, „ბრექსიტის“ პროცესის დასრულების შემდეგ, 2019 წლის 30 მარტიდან, ბრიტანეთს ორწლიანი, გარდამავალი პერიოდი მიეცეს.
ამ ინიციატივით ტერეზა მეი ფლორენციაში გამართულ სამიტზე გამოვიდა და აღნიშნა, რომ გაერთიანებული სამეფო ევროპას არ ტოვებს, არამედ ევროგაერთიანებიდან გადის, თუმცა ევროკავშირის ერთგულ მეგობრად რჩება.
მთავრობის მეთაურმა პირობა დადო, რომ გარდამავალ პერიოდში ბრიტანეთი დაკისრებულ გადასახადს სრულად დაფარავს.
საუბარია 20 მილიარდ ევროზე, რომელიც „ბრექსიტის“ შემდეგ ევროგაერთიანების ბიუჯეტს წევრი სახელმწიფოს გასვლის შედეგად მოაკლდება. მეის სიტყვით გამოსვლის პარალელურად, „ბრექსიტის“ მოწინააღმდეგეებმა ფლორენციაში საპროტესტო აქცია გამართეს.