გაეროს გენერალური ასამბლეის 72 სესიაზე სიტყვით გამოსვლამდე გიორგი კვირიკაშვილი გაეროს გენერალურ მდივანს შეხვდა.
პირისპირ აუდიენციის მთავარი თემა ქვეყნის ოკუპირებულ ტერიტორიებზე არსებული ვითარება, იძულებით გადაადგილებულ პირთა მდგომარეობა და ნდობის აღდგენის მიმართულებით საქართველოს ხელისუფლების მიერ გადადგმული ნაბიჯები იყო.
ანტონიო გუტიერეშთან შეხვედრა გაერო-ს შტაბ-ბინაში გაიმართა. მხარეებმა დეტალურად განიხილეს ე.წ ბორდერიზაციის პრობლემა, ის სირთულეები, რომელიც ოკუპირებულ ტერიტორიაზე მცხოვრებ საქართვლოს მოქალაქეებს ექმნებათ.
გუტიერეშმა წუხილი გამოითქვა გალის რაიონის სკოლებში ქართულ ენაზე სწავლის აკრძალვასთან დაკავშირებით.
ხაზი გაესვა ჟენევის მოლაპარაკებების ფორმატის მნიშვნელობას და მასში გაერო-ს და მისი წარმომადგენლის აქტიურ ჩართულობას.
გენერალურმა მდივანმა განსაკუთრებული კმაყოფილება გამოხატა საქართველოს ხელისუფლების თანმიმდევრული პოზიციის გამო, კონფლიქტის მოწესრიგებასთან დაკავშირებით, იმ მძიმე გამოწვევების ფონზე, რომელიც შექმნილია ოკუპირებულ ტერიტორიებზე.
შეხვედრაზე შეთანხმდნენ, რომ საქართველო კვლავაც იქნება გაერო-ს დღის წესრიგის მთავარ პრიორიტეტებში. პრემიერ-მინისტრმა გაერო-ს საპატიო სტუმართა წიგნში სამახსოვრო ჩანაწერი გააკეთა.