ბათუმის საავტორო ფილმების საერთაშორისო ფესტივალის BIAFF ფარგლებში დღეს ირანული კინოს ცნობილმა წარმომადგენელ, რეჟისორმა მოჰსედ მახმალბაფიმ მასტერ-კლასი გამართა.

“პირველად ვარ ბათუმის ფესტივალზე, ძალიან კარგი და თბილი გარემოა, ფილმების სპექტრიც საინტერესოა. ჩემი რჩევები ახალგაზრდა რეჟისორების მიმართ ის იქნება, რომ იმუშაონ იმაზე, რაც გულწრფელად აწუხებთ, რაც აინტერესებთ და გარშემო ხედავენ. ეს ფესტივალი მათ საინტერესო რეჟისორების გაცნობაში, გემოვნების დახვეწაში დაეხმარება“, - განაცხადა რეჟისორმა პირველ არხთან საუბრისას.

ბოლო ათი წლის განმავლობაში მოჰსენ მახმალბაფის ფილმები ფართოდაა წარმოდგენილი სხვადასხვა საერთაშორისო კინოფესტივალზე. მრავალი ჯილდოს მფლობელი რეჟისორი ირანული კინოს ახალი ტალღის წარმომადგენელია. ჟურნალმა „თაიმმა" მახმალბაფის 2001 წელს გადაღებული ფილმი „ყანდაარი" (Kandahar) ყველა დროის 100 საუკეთესო ფილმს შორის დაასახელა. მისი ნამუშევრები ირანის და ირანელი ხალხის უახლესი ისტორიის ყველაზე კარგი ქრონიკაა.

მოჰსენ მახმალბაფი ბევრი საპატიო ჯილდოს მფლობელია. ასევე, მიღებული აქვს დოქტორის საპატიო წოდებები სხვადასხვა უნივერსიტეტიდან, 50 საერთაშორისო ჯილდო, მათ შორის: 1998 წელს საფრანგეთში - ხელოვნებისა და ლიტერატურის მარშალი, 2006 წელს სომხეთში - სერგეი ფარაჯანოვის ჯილდო, 2002 წელს იტალიაში- ფრანსუა ტრიუფოს ჯილდო, 2001წელს იუნესკოსგან - ფედერიკო ფელინის საპატიო ჯილდო, 2006 წელს რომიდან - გამბედაობისა და სიმამაცის ჯილდო, 2003 წელს პუსანის კინოფესტივალზე - საუკეთესო, აზიელ კინორეჟისორად დასახელდა, ხოლო 2007 წელს აზიის კინოაკადემიის დეკანად აირჩიეს.

2005 წელს, აჰმადინეჯადის ხელისუფლებაში მოსვლის შემდეგ, მოჰსენ მახმალბაფმა ირანი დიქტატურის წინააღმდეგ პროტესტის ნიშნად დატოვა. ამჟამად რეჟისორი ოჯახთან ერთად ლონდონში ცხოვრობს.