აშშ-ის შემდეგ, ავღანეთში კონტინგენტის გაზრდის გადაწყვეტილება ნატო-მაც მიიღო. ამის შესახებ ჩრდილოატლანტიკური ალიანსის გენერალურმა მდივანმა იენს სტოლტენებრგმა სააგენტო Associated Press-ისთვის მიცემულ ინტერვიუში განაცხადა. სტოლტენბერგი ამჟამად ნიუ-იორკში იმყოფება, სადაც გაერო-ს გენერალური ასამბლეის 72-ე სესიაში მონაწილეობს.
იენს სტოლტენებრგის თქმით, ავღანეთის ძალების საწრვთნელ მისიაში მონაწილე ნატო-ს სამხედროების რაოდენობა რამდენიმე ათასით გაიზრდება.
როგორც ნატო-ს გენერალურმა მდივანმა აღნიშნა, ალიანსის რამდენიმე მოკავშირე და პარტნიორმა სახელმწიფომ უკვე განაცხადა, რომ ისინი ჩართავენ დამატებით სამხედროებს მისიაში.
“ამჟამად ჩვენ საბოლოო გადაწყვეტილების მიღების პროცესში ვიმყოფებით. ეს გადაწყვეტილება ემსახურება იმას, რომ ავღანეთი არასდროს გახდეს საერთაშორისო ტერორისტებისთვის თავშესაფარი. ამისთვის საუკეთესო გზაა, ავღანელებს მივცეთ საშუალება, ჰყავდეს ძლიერი უსაფრთხოების ძალები. არ ვფიქრობ, რომ ეს მარტივი ამოცანაა, მაგრამ მტკიცედ მჯერა, რომ ავღანეთში საბრძოლველად ნატო-ს ძალების გაგზავნის ნაცვლად, საუკეთესო გზა, ავღანური ძალების წვრთნაა“, - განაცხადა იენს სტოლტენბერგმა.
ნატო-ს გენერალური მდივანი ასევე მიესალმა ავღანეთის შესახებ დონალდ ტრამპის სტრატეგიას, რომლის თანახმადაც აშშ ავღანეთში დამატებით სამი ათასს სამხედროს გაგზავნის.