ქობულეთის გამგეობასთან საპროტესტო აქცია მიმდინარეობს. ფიჭვნარის დასახლების რამდენიმე ქუჩის მცხოვრებლები მიწის ნაკვეთების დაკანონებას მოითხოვენ.
აქციის მონაწილეების თქმით, სადავო ფართობს ისინი საბჭოთა პერიოდში ფლობდნენ, გასული საუკუნის 90-იანი წლებიდან კი იჯარის ხელშეკრულებით სარგებლობენ და შესაბამის გადასახადსაც იხდიან.
მათი განცხადებით, იმის გამო, რომ აჭარაში ასლან აბაშიძის მმართველობის დროს მიწის რეფორმა არ ჩატარებულა, მათ ნაკვეთების საკუთრებაში დარეგისტრირება დღემდე ვერ მოახერხეს.
აქციის მონაწილეები ირწმუნებიან, რომ ქობულეთის მიწის საკუთრების აღიარების კომისიამ მათი საქმეები შეისწავლა, ნაწილს მიწები დაუკანონა, ნაწილთან დაკავშირებით კი საქმეების განხილვა გაურკვეველი მოტივით შეაჩერა.
მათი განცხადებით, გადაწყვეტილებას ქობულეთში ათეულობით ოჯახი ელოდება.
აქციის მონაწილეებს ამ წუთებში საკუთრების უფლების აღიარების კომისიაში ხვდებიან.