ვაშინგტონმა ჩრდილოეთ კორეის პრობლემის დიპლომატიური გზით მოგვარების გზები ამოწურა. თუ ფხენიანი უგუნურ პოლიტიკას განაგრძობს, შეერთებულ შტატებს მოუწევს, დაიცვას საკუთარი თავი და მოკავშირეები და ჩრდილოეთ კორეა განადგურდება, - ამის შესახებ გაერო-ში შეერთებული შტატების ელჩმა, ნიკი ჰეილიმ ტელეკომპანია CNN-ისთვის მიცემულ ინტერვიუში განაცხადა.
მისი თქმით, აშშ-ის პრეზიდენტ დონალდ ტრამპის განცხადება ფხენიანზე „ცეცხლისა და მრისხანების“ დატყდომასთან დაკავშირებით, უბრალოდ მუქარა არ იყო. დიპლომატი აღნიშნავს, რომ ვაშინგტონი ყველა შესაძლო გზით ცდილობდა აღნიშნული საკითხის მოგვარებას გაერო-ს უშიშროების საბჭოს ფარგლებში, თუმცა თუ სარაკეტო გამოცდები გაგრძელდება, ამ პრობლემას უკვე პენტაგონი სამხედრო გზით მიხედავს.
15 სექტემბერს ფხენიანმა მორიგი სარაკეტო გაშვება განახორციელა. რაკეტამ იაპონიას გადაუფრინა და წყნარ ოკეანეში 3700 კილომეტრის დაფარვის შემდეგ ჩავარდა.