ირანი ერაყის ქურთისტანთან საზღვარს იმ შემთხვევაში დახურავს, თუ რეფერენდუმის შედეგად ბაღდადისგან დამოუკიდებელი გახდება. ამის შესახებ უშიშროების უმაღლესი საბჭოს მდივანმა ალი შახმანიმ განაცხადა.
მისი თქმით, საზღვრის შესახებ შეთანხმება კონკრეტულად ერაყის ცენტრალურ ხელისუფლებასთან არსებობს. ქურთისტანის გამოყოფა კი ყველა საერთო გამშვები პუნქტის დახურვას გამოიწვევს.
ირანულ მედიაში ასევე აღნიშნავენ, რომ ეს თეირანთან არსებული შეთანხმებების გადახედვასაც გამოიწვევს.
ერაყის ქურთისტანის ავტონომიურმა ხელისუფლებამ ერაყისგან გამოყოფის მიზნით, ცენტრალური ხელისუფლების წინააღმდეგობის მიუხედავად, რეფერენდუმი 25 სექტემბერს დანიშნა. ოფიციალური ბაღდადი რეფერენდუმს არაკანონიერად მიიჩნევს.
გასულ კვირას აშშ-ის, საფრანგეთის, გერმანიისა და გაერო-ს წარმომადგენლებმა ერაყის ქურთისტანის ლიდერთან, მასუდ ბარზანისთან შეხვედრაზე რეფერენდუმის გადატანის წინადადება წარადგინეს, თუმცა ბარზანიმ ამაზე უარი თქვა, თუ სანაცვლოდ რაიმე ალტერნატივას არ შესთავაზებენ.
დამოუკიდებლობის რეფერენდუმს უდროოდ მიიჩნევს, გაერო-ს გენერალური მდივანი ანტონიო გუტიერეში და მხარეებს კომპრომისული გადაწყვეტილების მისაღებად დიალოგისკენ მოუწოდებს.
ანტონიო გუტიერეშს მიაჩნია, რომ ნებისმიერი ცალმხრივი გადაწყვეტილება, ამ ეტაპზე, ტერორისტული დაჯგუფება „ისლამური სახელმწიფოს“ წინააღმდეგ ბრძოლას აფერხებს.