იერუსალიმში ულტრაორთოდოქსი ებრაელებისა და პოლიციის თანამშრომლების შეტაკების დროს რვა ადამიანი დააკავეს.
სამართალდამცველებმა წყლის ჭავლი მას შემდეგ გამოიყენეს, რაც ადგილზე ვითარება დაიძაბა. საპროტესტო აქციის მონაწილეებმა გზა გადაკეტეს და ქვების სროლა დაიწყეს.
აქციის დაწყების საფუძველი სამხედრო ახალწვეულის დაპატიმრება გახდა, რომელმაც რეკრუტირებისთვის გამოცხადება ვერ შეძლო.
გასულ კვირას, ისრაელის უზენაესმა სასამართლომ ქვეყნის სამხედრო გაწვევის კანონი, რომელიც რელიგიურ ნიადაგზე სემინარიის სტუდენტებს სამხედრო სამსახურში გაწვევისგან ათავისუფლებდა, არაკონსტიტუციურად სცნო.
ისრაელის მოქალაქეებს, როგორც მამაკაცებს, ასევე ქალებს, 18 წლის ასაკიდან სამხედრო სამსახურის ვალდებულება აქვთ. ქალები არმიაში 2 წელს, მამაკაცები კი 3 წელს მსახურობენ.