ლონდონის პოლიცია მეტროში განხორციელებულ ტერაქტში ეჭვმიტანილ პირს ეძებს. პრემიერ-მინისტრის გადაწყვეტილებით, დედაქალაქში საფრთხის დონის მაჩვენებელი კრიტიკულ ნიშნულამდე გაიზარდა.
ლონდონის ქუჩებში უსაფრთხოების ნორმების დაცვაში პოლიციას დახმარებას ჯარისკაცები გაუწევენ. პრემიერის განკარგულების თანახმად, ქალაქის გარკვეულ ნაწილში გადაადგილება შეიზღუდება.
მეტროსადგურში განხორციელებული ტერორისტული აქტის შედეგად, 27 ადამიანი დაშავდა, რამდენიმე მათგანის მდგომარეობა კრიტიკულია.
მომხდარზე პასუხისმგებლობა ე.წ. ისლამურმა სახელმწიფომ აიღო. მიმდინარე წელს ეს უკვე მეხუთე ტერაქტია, რომელიც გაერთიანებულ სამეფოში განხორციელდა.
დონალდ ტრამპმა სოციალურ ქსელ ,,თვითერში” დაწერა, რომ ტერორისტების მიმართ დასავლეთი შეუწყნარებელი უნდა იყოს.