2018 – 2021 წლებში დედაქალაქში განსახორციელებელი სარეაბილიტაციო - აღდგენითი სამუშაოები, მიწათსარგებლობის გენერალური გეგმა, ეკოლოგიური სტანდარტების დამკვიდრება, სამშენებლო სტანდარტების გამკაცრება, მოწესრიგება და ქალაქის ვიზუალური სტანდარტის შექმნა - ეს არის ის ძირითადი მიმართულებები, რაზეც „ქართული ოცნების“ თბილისის მერობის კანდიდატმა კახა კალაძემ ურბანული პოლიტიკის პრეზენტაციაზე გაამახვილა ყურადღება.
მერობის კანდიდატმა ისაუბრა დედაქალაქში არსებული კულტურული მემკვიდრეობის 1700 ძეგლების დაცვისა და რეაბილიტაციის აუცილებლობაზე.
კალაძის ურბანული პოლიტიკის ნაწილში მოხვდა ძველი თბილისის რეაბილიტაციის საკითხიც. ურბანულ პოლიტიკაზე საუბრისას კალაძემ მიმართა დეველოპერებსა და სამშენებლო კომპანიებს და თქვა, რომ მისი მერობის შემთხვევაში, მწვანე სივრცეებისა და კულტურული მემკვიდრეობის შეზღუდვის ხარჯზე მშენებლობის არცერთი ნებართვა არ გაიცემა.
მერობის კანდიდატის ურბანული პოლიტიკის პრეზენტაციას ესწრებოდნენ როგორც „ქართული ოცნების“ გუნდის წევრები, ასევე არქიტექტორები, დეველოპერები და სამშენებლო კომპანიების წარმომადგენლები.