დიდი ბრიტანეთის პარლამენტმა მეორე მოსმენით დაამტკიცა კანონპროექტი, ევროკავშირის კანონმდებლობის გაუქმების შესახებ. ინიციატივას 326-მა პარლამენტარმა მისცა ხმა, წინააღმდეგი 290 იყო.

კენჭისყრის ტრანსლაცია დიდი ბრიტანეთის პარლამენტის ოფიციალურ ვებგვერდზე პირდაპირ ეთერში მიმდინარეობდა. მას რვასაათიანი დებატები უძღოდა წინ.

კანონპროექტის თანახმად, ევროკავშირში მოქმედი 12 000 საკანონმდებლო ნორმა, „ბრექსიტის“ პროცესის დასრულების შემდეგ, ბრიტანულ კანონმდებლობაში გადავა.

მეორე მოსმენა კანონპროექტის განხილვის ერთ-ერთი შუალედური სტადიაა, თუმცა ის ძალიან მნიშვნელოვანია, რადგან, ფაქტობრივად, ეს არის დოკუმენტის პირველი საჯარო განხილვა. ახლა კანონპროექტის პარლამენტის კომიტეტებმა უნდა დაამტკიცონ.

დიდი ბრიტანეთის პარლამენტში გვიან ღამით გამართული კენჭისყრის შედეგებს გამოეხმაურა პრემიერ-მინისტრი ტერეზა მეი. მისი თქმით, ეს არის ისტორიული გადაწყვეტილება, რომელიც ლონდონს მისცემს საშუალებას, უფრო თავდაჯერებულად აწარმოოს მოლაპარაკებები ბრიუსელთან.

„პარლამენტმა ისტორიული გადაწყვეტილება მიიღო და ბრიტანელი ხალხის ნებას მხარი დაუჭირა. ჯერ კიდევ ბევრი სამუშაოა წინ, თუმცა ეს გადაწყვეტილება ნიშნავს, რომ ჩვენ შეგვიძლია წინ წავიწიოთ მოლაპარაკებებში და ამისთვის მყარი საფუძველი გვქონდეს“, - განაცხადა პრემიერმა.

კომიტეტებში კანონპროექტის განხილვის თარიღი ჯერ უცნობია, თუმცა, როგორც მოსალოდნელია, ეს პროცედურა ოქტომბერში დაიწყება. ამ ეტაპის დასრულების შემდეგ, კანონპროექტს დიდი ბრიტანეთის პარლამენტის ქვედა პალატა მესამე მოსმენით უყრის კენჭს და დამტკიცების შემთხვევაში, 62-გვერდიანი დოკუმენტის განხილვა დიდი ბრიტანეთის პარლამენტის ლორდთა პალატაში გაგრძელდება.

ევროკავშირის კანონმდებლობის გაუქმების შესახებ კანონპროექტის დამტკიცება დიდ ბრიტანეთში 1972 წელს მიღებულ ევროპული თანამეგობრობის შესახებ აქტს გააუქმებს და ქვეყანაში ევროპული სასამართლოების იურისდიქციას შეწყვეტს.