საკონსტიტუციო სასამართლოს პირველმა კოლეგიამ პორნოგრაფიული ხასიათის მასალების უკანონოდ გავრცელებასთან დაკავშირებული სარჩელის არსებითი განხილვა დღეს განაახლა.
პარლამენტის წინააღმდეგ სარჩელი მოქალაქე გიორგი ლოლუას ეკუთვნის. მოქალაქე სისხლის სამართლის კოდექსის 255-ე მუხლის იმ ნაწილის არაკონსტიტუციურად ცნობას ითხოვს, რომელიც არეგულირებს შემდეგ გარემოებებს: „პორნოგრაფიული ნაწარმოების, ნაბეჭდი გამოცემის, გამოსახულების ან პორნოგრაფიული ხასიათის სხვა საგნის უკანონოდ დამზადება, გავრცელება ან რეკლამირება, აგრეთვე ასეთი საგნით ვაჭრობა ანდა მისი შენახვა გაყიდვის ან გავრცელების მიზნით".
მოსარჩელე მიიჩნევს, რომ კანონი ბუნდოვანია და არ განსაზღვრავს მკაფიოდ რა იგულისხმება პორნოგრაფიაში, მის უკანონო გავრცელებაში.
მოსარჩელის პოზიციით, კანონის ბუნდოვანება კონსტიტუციით გარანტირებული გამოხატვის თავისუფლების შეზღუდვის რისკებს ქმნის.
საქმესთან დაკავშირებით დღეს მოსამართლეები მოწმის სტატუსით საქართველოს კომუნიკაციის მარეგულირებელი ეროვნული კომისიის წარმომადგენელსა და ხელოვნებათმცოდნეს მოუსმენენ.