უკრაინაში სასაზღვრო კონტროლის გარეშე შესული მიხეილ სააკაშვილი ისევ ლვოვშია.
ოდესის ყოფილი გუბერნატორი უკრაინელ სამართალდამცავებს ქურდობაში ადანაშაულებს და სპეციალური სტატუსის მინიჭებას ითხოვს.
პოროშენკოს ყოფილი მრჩეველი ამტკიცებს, რომ მისი უკრაინული პასპორტი ავტობუსიდან მოიპარეს, რის გამოც ქვეყანაში დამატებითი დაცვა სჭირდება.
საქართველოს ყოფილი პრეზიდენტი, რომელსაც ივლისის ბოლოდან უკრაინის მოქალაქეობა ჩამორთმეული აქვს, უკრაინის საზღვრის უკანონოდ კვეთას უარყოფს და ამბობს, რომ ნეიტრალური ტერიტორიიდან სასაზღვრო მონაკვეთზე მხარდამჭერებმა ხელში აყვანილი გადაიყვანეს.
სისხლის სამართლის საქმე ორი მუხლით უკვე აღძრულია, თუმცა ბრალი ჯერ არავისთვის წაუყენებიათ. ოფიციალური კიევის რეაქცია მწვავეა. უკრაინის ხელისუფლების პირველი პირები შეგინის გამშვებ პუნქტთან გუშინ საღამოს მომხდარ ფაქტს დანაშაულად და ძალისმიერ შეჭრად აფასებენ.
მოამბის გადამღები ჯგუფები უკრაინაში რჩებიან - გურამ როგავას ვრთავთ ლვოვიდან.