ლიტვის სეიმის ვიცე-სპიკერი, ქვეყნის ყოფილი პრემიერი გედიმინას კირკილასი პირველი არხისთვის მიცემულ ექსკლუზიურ ინტერვიუში უკრაინაში განვითარებულ მოვლენებს აფასებს. ვიცე-სპიკერი ამბობს, რომ ეს პროცესები უკრაინასა და საქართველოზე ნეგატიურად აისახება.
„ჩემი პირადი აზრია, რომ განვითარებული მოვლენები არც უკრაინისთვის არის კარგი და არც - საქართველოსთვის. უკრაინისთვის ცუდია, რადგან აქვს ზეწოლის მიზეზი, რომ სახელმწიფო ვერ აკონტროლებს საკუთარ საზღვრებს, საქართველოსთვის კი იმიტომ, რომ უკვე გაურკვეველი ხდება სააკაშვილის საქართველოში ექსტრადირების ბედი. ასე რომ, ეს ცუდი შემთხვევაა“, - ამბობს ლიტველი პოლიტიკოსი.
სეიმის ვიცე-სპიკერი პარალელს ავლებს ლიტვის ისტორიასთან, როცა ქვეყნის საზღვრებს ბოლო რუსი სამხედროები ტოვებდნენ.
„ძალიან გავს ეს ფაქტი მოვლენებს, რომელიც ახსოვს ლიტვის ისტორიას. როცა იყო ბოლო ეტაპი ლიტვიდან რუსული ჯარის გაყვანის, უცბად საიდანღაც მოხალისეები აჯანყდნენ და ძალიან რთული ვითარება შეიქმნა. ეს იმიტომ ვახსენე, რომ ყველა ამ სიტუაციას კარგად იყენებს რუსეთი საკუთარი პროპაგანდისა თუ პოლიტიკისთვის. სააკაშვილი კი დაკავშირებულია ერთდროულად უკრაინასთან და საქართველოსთან",-აღნიშნა გედიმინას კირკილასმა.
ამ შეფასებასთან ერთად, ლიტვის ვიცე-სპიკერი ამბობს, რომ ნებისმიერ შემთხვევაში ევროპას სურს, პრობლემა კანონის შესაბამისად გადაიჭრას.
გედიმინას კირკილასის თქმით, ისეთ საკითხებს, როგორიც არის სააკაშვილის მოქალაქეობა ან კონფლიქტური სიტუაცია, კანონი და სასამართლო უნდა წყვეტდეს და არა - პოლიტიკოსები.