კახეთში, გურჯაანის მუნიციპალიტეტის სოფელ მელაანის გადასახვევთან ერთმანეთს ოთხი მანქანა შეეჯახა - ფორდის მარკის სამარშრუტო ტაქსი და სამი მსუბუქი ავტომობილი.
შინაგან საქმეთა სამინისტროს ინფორმაციით, შემთხვევის შედეგად ორი ადამიანი დაშავდა.
როგორც პირველ არხს მელაანში გურჯაანის გამგებლის წარმომადგენელმა გოჩა მესხიშვილმა დაუდასტურა, ავტოსაგზაო შემთხვევის შედეგად მძიმედ დაშავდა 15 წლის მოზარდი, რომელიც გურჯაანის საავადმყოფოშია გადაყვანილი.
რაც შეეხება სხვა დაშავებულებს, მათ სხეულის სხვადასხვა სახის დაზიანება აღენიშნებათ.
როგორც პირველ არხს შინაგან საქმეთა სამინისტროში განუცხადეს, გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ჯანმრთელობის ნაკლებად მძიმე დაზიანება.