სახელმწიფო ბრალდების მტკიცებულებების გამოკვლევით გრძელდება კობა დავითაშვილის ცემის ფაქტზე საქმის არსებითი განხილვა. თბილისის საქალაქო სასამართლოში პროკურატურის მოწმეებს უსმენენ.
საქმეში დაზარალებულად ცნობილ პარლამენტის ყოფილ დეპუტატს სასამართლოსთვის ჩვენება ჯერ არ მიუცია. კობა დავითაშვილი ამბობს, რომ გამოძიება უნდა გაგრძელდეს.
საქმე მთავარმა პროკურატურამ გახსნილად 2016 წლის ივლისში გამოაცხადა და თავისუფლების უკანონოდ აღკვეთის ორგანიზებისა და სამსახურებრივი უფლებამოსილების გადამეტების ფაქტზე ბრალი ყოფილ გენერალურ პროკურორს ზურაბ ადეიშვილს წაუყენა.
სისხლის სამართლის პასუხისგებაში მისცეს ფინანსთა სამინისტროს შემოსავლების სამსახურის უფროსის ყოფილი მოადგილე დავით ქარსელაძე და ამავე სამინისტროს სპეცდანიშნულების რაზმის ყოფილი უფროსი ედიშერ კობახიძე. დღევანდელ პროცესზე დავით ქარსელაძის მძღოლი იკითხება.