სტრასბურგის სასამართლოში საქართველოდან წარდგენილი მოსამართლეობის ორი კანდიდატი -ლალი ფაფიაშვილი და ოთარ სიჭინავა ევროსაბჭომ კვალიფიციურ კანდიდატებად ცნო.
ინფორმაციას იუსტიციის მინისტრი ავრცელებს. თეა წულუკიანის განმარტებით, ოფიციალურმა თბილისმა შესაბამისი წერილი ევროსაბჭოს მრჩეველ-ექსპერტთა პანელიდან მიიღო, შედეგად მოსამართლეობის კანდიდატთა შესარჩევი პროცედურის პირველი ეტაპი დასრულებულია.
მეორე ეტაპზე დაგეგმილია გასაუბრება ევროსაბჭოს საპარლამენტთაშორისო ასამბლეის კომიტეტში, პროცედურის წარმატებით გავლის შემდეგ კი წევრი ქვეყნების დეპუტატები ერთ-ერთ მათგანს კენჭს უყრიან და ადამიანის უფლებათა ევროპულ სასამართლოში მოსამართლედ აირჩევენ.
შეგახსენებთ, რომ საქართველოდან, ლალი ფაფიაშვილის და ოთარ სიჭინავას გარდა, წარდგენილია ლადო ჭანტურიას კანდიდატურა, რომელიც ევროსაბჭომ კვალიფიციურად ჯერ კიდევ მეორე კონკურსის დროს ცნო.