მიხეილ სააკაშვილის ექსტრადირების საკითხის შესასწავლად დოკუმენტები უკრაინის იუსტიციის სამინისტრომ გენერალურ პროკურატურას გადაუგზავნა. განცხადება უკრაინის იუსტიციის სამინისტროს ოფიციალურ ვებგვერდზე გამოქვეყნდა.
დოკუმენტის თანახმად, საქართველო ითხოვს უკრაინისგან სააკაშვილის გადაცემას. წერილში აღნიშნულია, რომ სააკაშვილი ოთხ საქმეზეა ბრალდებული. განცხადებაში ჩამოთვლილია კონკრეტული საქმეები და ნათქვამია, რომ სააკაშვილს აღკვეთის ღონისძიებად პატიმრობა თბილისის საქალაქო სასამართლომ შეუფარდა, შემდეგ კი, როდესაც საგამოძებო ორგანოში არ გამოცხადდა, საქართველოს გენერალურმა პროკურატურამ მასზე ძებნა გამოაცხადა.
განცხადება გაავრცელა საქართველოს პროკურატურამაც, სადაც აღნიშნულია, რომ კიდევ ერთი მოთხოვნით უკრაინას 2017 წლის 1 სექტემბერს მიმართეს.
სააკაშვილის ადვოკატი იმედოვნებს, რომ ექტრადირება არ მოხდება და უკრაინა გაითვალისწინებს ევროკონვენციის იმ მუხლებს, სადაც აღნიშნულია, რომ არ შეიძლება პირის იმ ქვეყნისთვის გადაცემა სადაც შესაძლოა ის პოლიტიკურ დევნას დაექვემდებაროს.