სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა თბილისის საკრებულოს წევრი ზურაბ ნეფარიძე დააკავეს - ინფორმაციას ადასტურებენ სახელმწიფო უსაფრთხოების სამსახურში, თუმცა მეტ დეტალზე არ საუბრობენ.
არსებული ინფრომაციით, ზურაბ ნეფარიძე ქრთამის აღების ფაქტზეა დაკავებული. ზურაბ ნეფარიძე თბილისის საკრებულოში ფრაქცია „ეროვნული ფორუმის“ წევრია.
ზურაბ ნეფარიძის დაკავების შესახებ დამატებით ინფორმაციას არ ფლობს თბილისის საკრებულოში ფრაქცია „ეროვნული ფორუმის“ თავმჯდომარე. ავთანდილ დავითაძის განცხადებით, ზურაბ ნეფარიძე უკვე ერთი წელია, პარტიის პოლიტსაბჭოს გადაწყვეტილებით, „ეროვნული ფორუმის“ წევრი აღარ იყო, თუმცა მისი პირადი თხოვნის საფუძველზე ის კვლავ რჩებოდა თბილისის საკრებულოში ფრაქცია „ეროვნული ფორუმის“ წევრად.
ზურაბ ნეფარიძე ასევე არის ნავთლუღის მაჟორიტარი დეპუტატი და ის თბილისის საკრებულოს ორი კომისიის - იურიდიულ საკითხთა და ადამიანის უფლებათა კომისიის წევრია.