პრემიერ-მინისტრის განცხადებით, შეიძლება ითქვას, რომ ბორჯომის ხეობაში ხანძარი ლიკვიდირებულია. გიორგი კვირიკაშვილი აღნიშნავს, რომ მომდევნო დღეების განმავლობაში შესაძლოა იყოს ცალკეული სახანძრო წერტილოვანი კერები, ამიტომ შტაბი მუშაობას მაინც გააგრძელებს.
პრემიერ-მინისტრმა განსაკუთრებული მადლობა გადაუხადა იმ ადამიანებს, რომლებმაც სიცოცხლის რისკის ფასად ტყე განადგურებისგან გადაარჩინეს.
საქართველოს პრემიერ-მინისტრი ბორჯომის ხეობაში სომეხი მეხანძრე-მაშველების ბანაკშიც იმყოფებოდა.
გიორგი კვირიკაშვილის თქმით, მათ სტიქიის წინააღმდეგ ბრძოლაში მნიშვნელოვანი წვლილი შეიტანეს.
პრემიერმა მადლობა გადაუხადა სომეხ ხალხს, სომხეთის პრეზიდენტს და პრემიერ-მინისტრს. სომხეთის საგანგებო სიტუაციის სამინისტრომ ხანძრის ჩაქრობის პროცესში დასახმარებლად 4 ერთეული მაღალი გამავლობის სახანძრო-სამაშველო ტექნიკა, 9 ერთეული სახანძრო-სამაშველო ტექნიკა და 65 მეხანძრე-მაშველი გამოაგზავნა.
გიორგი კვირიკაშვილმა მფრინავებსა და ეკიპაჟის წევრებსაც შეხვდა, რომლებიც სტიქიას რამდენიმე დღის განმავლობაში ებრძოდნენ, პრემიერ-მინისტრი ეკიპაჟების დისლოკაციის ადგილზე მივიდა და საქართველოს, აზერბაიჯანის, თურქეთის, ბელარუსის სახელმწიფოების შესაბამისი უწყებების მფრინავებს და ეკიპაჟის წევრებს მადლობა გადაუხადა.