საქართველოს რკინიგზასთან დაკავებული პირების სასამართლო პროცესი რვა სექტემბრისთვის გადაიდო.
მოსამართლემ დააკმაყოფილა დაკავებულების ადვოკატების შუამდგომლობა, რომლებიც საქმის გასაცნობად სხდომის გადადებას ითხოვდნენ.
შუამდგომლობას დაეთანხმნენ საპატრულო პოლიციის წარმომადგენლებიც, მათ ასევე ვადა ითხოვეს ვიდეო ჩანაწერების წარმოდგენისთვის.
მანამდე კი მოსამართლემ ადვოკატების კიდევ ერთი შუამდგომლობა დააკმაყოფილა და ადმინისტრაციული წესით დაკავებული ათივე პირის საქმე ერთ საქმედ გააერთიანა.
წვრილმანი ხულიგნობის და პოლიციისთვის წინააღმდეგობის გაწევის მუხლებით გუშინ დაკავებულმა ყველა პირმა სასამართლო სხდომის დარბაზი უკვე დატოვა.
როგორც სხდომის შემდეგ მათ განაცხადეს, აქციაზე მისულები იყვნენ რკინიგზელებისთვის სოლიდარობის გამოსაცხადებლად, თუმცა პოლიციამ აქცია დაარბია.
საქართველოს რკინიგზის შენობასთან დაპირისპირება მოხდა, რა დროსაც ათი პირი დააკავეს.
მათივე განცხადებით, სხეულზე დაზიანებები აქვთ რომელიც სამართალდამცველებმა აქციის დაშლის და დაკავების დროს მიაყენეს.
რაც შეეხება სანქციებს რასაც მათთვის წარდგენილი მუხლები ითვალისწინებს - გულისხმობს ჯარიმას 2000 ლარამდე ან 15 დღიან ადმინისტრაციულ პატიმრობას.