400-მდე მეხანძრე-მაშველთან ერთად სტიქიის ზონაში მობილიზებულია განსაკუთრებულ დავალებათა დეპარტამენტის 500 თანამშრომელი. ცოცხალი ძალა ხანძრის ლიკვიდირებას სპეციალური ტექნიკით და ვერტმფრენებით ცდილობს.
რთული რელიეფური პირობების გამო ცეცხლის კერებთან მისასვლელად და სახანძრო ტექნიკის მისაყვანად გვიან ღამით არჯევანის ტყიდან თროთის მთამდე გზა გაჭრეს.
წინასწარი ინფორმაციით, ცეცხლმოკიდებული ტერიტორიის ფართობი 12 ჰექტარს აღწევს. ხანძრის კერებთან ყველაზე ახლოს მდებარე სოფელ დაბის მცხოვრებლები დამხარებას ითხოვენ.
ორი დღის წინ, შუადღისას მთის ფერდობზე გაჩენილი ხანძარი გუშინ დღის პირველ ნახევარში თითქმის ლოკალიზებული იყო, თუმცა ქარის გამო ცეცხლის ახალი კერები გაჩნდა. უკვე მეორე დღეა, რთული რელიეფური პირობების, ძლიერი ქარის და ნახანძრალი საფარის გამო ხანძარი სწრაფად ვრცელდება.