საქართველოს პრეზიდენტის რეზიდენციასთან „პროგრესულ-დემოკრატიულმა მოძრაობამ“ აქცია გამართა. მათ პრეზიდენტს წერილობით მიმართეს და პოლიტიკური პარტიებისთვის თანაბარი მედიაგარემოს უზრუნველყოფა მოითხოვეს.
„ჩვენ გვესმის, რომ პრეზიდენტს არ აქვს პირდაპირი უფლება, ჩაერიოს კომერციული ტელევიზიების საქმიანობაში, მაგრამ ჩვენ გიორგი მარგველაშვილს მივმართავთ როგორც კონსტიტუციის გარანტს, დაინტერესდეს დღევანდელი მედიაგარემოთი და გააკეთოს პოლიტიკური განცხადება“, - განაცხადა პარტიის ხელმძღვანელმა ლაშა სტურუამ.
მისი თქმით, ადგილობრივი თვითმმართველობის არჩევნებისთვის მზადება „პროგრესულ-დემოკრატიულმა მოძრაობამაც“ დაიწყო. უახლოეს დღეებში კი თბილისის მერობის კანდიდატსაც წარადგენენ.
როგორც პარტიის წევრებმა აღნიშნეს, წინასაარჩევნო კამპანია სხვა პარტიების მსგავსად მათაც დაიწყეს და სურთ, რომ მედიამ საეთერო დრო მათაც დაუთმოს.
აქციის მონაწილეები პრეზიდენტის ადმინისტრაციაში ზურა მაჭარაძეს შეხვდებიან.