კანადის ქალაქ კვებეკში ულტრანაციონალისტების აქციის მონაწილეებსა და მათ მოწინააღმდეგებს შორის დაპირისპირება მოხდა.
ულტრამემარჯვენეთა მიტინგში სულ 200-მდე ადამიანი მონაწილეობდა. ანტიფაშისტურ დემონსტრაციაზე კი გაცილებით მეტი ადამიანი მივიდა.
დაპირისპირების შედეგად, ნაციონალისტები იძულებულები გახდნენ, ქალაქის ცენტრში მიწისქვეშა ავტოსადგომისთვის თავი შეეფარებინათ.
ულტრამემარჯვენეები აშშ-დან კანადაში არალეგალური მიგრაციის წინააღმდეგ გამოდიოდნენ. მათ მსვლელობა ადგილობრივ ხელისუფლებასთან შეთანხმებული ჰქონდათ. აქცია ახალი დაწყებული იყო, როდესაც მათ ანტიფაშისტებმა ქვები და ბოთლები დაუშინეს. ადგილობრივი მედიის ინფორმაციით, დაკავებულია რამდენიმე ადამიანი.
კანადის პრემიერ-მინისტრმა ჯასტინ ტრიუდომ კვებეკში ულტრამემარჯვენეების მიერ ორგანიზებული აქცია დაგმო და მათ „რასისტების პატარა უმცირესობა“ უწოდა.