ხელბურთში ერთადერთი ოლიმპიური ჩემპიონი საქართველოდან, 63 წლის ალექსანდრე ანპილოგოვი გერმანიაში ცხოვრობს. 1976 წლის მონრეალის ოლიმპიური თამაშების და 1982 წლის მსოფლიო ჩემპიონატის გამარჯვებულს დღეს სპორტის რაინდის წოდება გადაეცა, ხოლო თბილისის ოლიმპიური სასახლის დიდ დარბაზს - მისი სახელი მიენიჭა.

ღონისძიებაზე სპორტისა და ახალგაზრდობის საქმეთა მინისტრმა, ტარიელ ხეჩიკაშვილმა განაცხადა, რომ შესაძლოა, ანპილოგოვი საქართველოში დაბრუნდეს და ქართული ხელბურთის განვითარებაზე იზრუნოს.

„სპორტის რაინდის წოდება ჩემთვის დიდი პატივია. საქართველოში ვარ დაბადებული და დიდი სურვილი მაქვს, რომ ჩემს ქვეყანას გამოვადგე. სამწუხაროდ, ჯანმრთელობა ხელს არ მიწყობს. მაგრამ ყოველთვის ვამბობდი, რომ ბოლოს ისევ საქართველოში უნდა ვიცხოვრო. მინდა, რომ აქ კიდევ იზრდებოდნენ ხელბურთის ვარსკვლავები, რისი პოტენციალიც ნამდვილად არსებობს“, – ამბობს ანპილოგოვი.

მან საქართველოში ჩატარებული 19-წლამდელ ხელბურთელთა მსოფლიოს ჩემპიონატიც შეაფასა.

„ასეთი დონის ტურნირის გამართვას ყველას არ ანდობენ. საქართველომ, ხელისუფლების თანადგომითა და მონდომებით კი, ეს დაიმსახურა. შემიძლია თამამად ვთქვა, რომ ტურნირი მაღალ დონეზე იყო ორგანიზებული და ხელბურთის საერთაშორისო ორგანიზაციის იმედები გაამართლა“, - აღნიშნა ანპილოგოვმა.