საკონსტიტუციო ცვლილებებზე მმართველი გუნდისა და ოპოზიციის შეხვედრა თბილისში, პარლამენტის შენობაში დღეს გაიმართება.
ამ დროისთვის არსებული ინფორმაციით, შეხვედრას, რომელიც 17.00 საათზეა დანიშნული, საპარლამენტო უმრავლესობის ლიდერი არჩილ თალაკვაძე გაუძღვება.
კვალიფიციურ ოპოზიციურ პარტიებს შეხვედრა არჩილ თალაკვაძემ 15 აგვისტოს შესთავაზა.
"საკონსტიტუციო რეფორმისთვის შეიქმნა კომისია, რომელმაც შეიმუშავა კონსტიტუციის პროექტი, მთელი ქვეყნის მასშტაბით ჩატარდა საჯარო განხილვები, შედგა კონსულტაციები ვენეციის კომისიასთან და გაიმართა საპარლამენტო განხილვები. მადლობას ვუხდით კომისიის ყველა წევრს მონაწილეობისა და გაწეული სამუშაოსთვის. ჩვენი გუნდი მზად არის საშემოდგომო სესიამდე დარჩენილი დრო გამოიყენოს პოლიტიკური დიალოგისთვის. შესაბამისად, ყველა კვალიფიციურ ოპოზიციურ პარტიას ვთავაზობთ, მიმდინარე კვირაში შევიკრიბოთ და განვაახლოთ მსჯელობა საკონსტიტუციო ცვლილებების გარშემო. საქართველოში ჩვენ წარმოვადგენთ პოლიტიკურ პარტიებს, თუმცა საზღვარგარეთ ყველანი წარმოვადგენთ საქართველოს - ამიტომ მნიშვნელოვანია, სტრასბურგში შეხვედრამდე, კიდევ ერთხელ განვიხილოთ საკონსტიტუციო რეფორმის ყველა მნიშვნელოვანი საკითხი", - განაცხადა თალაკვაძემ.