Gem Fest-ის დამფუძნებელი გიორგი სიგუა აცხადებს, რომ ფესტივალთან დაკავშირებით ფინანსთა სამინისტროს საგამოძიებო სამსახურში დაკითხვაზეა დაბარებული.

როგორც სიგუამ აღნიშნა, საგამოძიებო უწყებაში 18 აგვისტოს 11:00 საათზეა დაბარებული და ყველა კითხვაზე პასუხის გაცემას აპირებს.

"დაბარებული ვარ მოწმის სახით, ყველა კითხვას გავცემ პასუხს. ჩემს გარდა, ნახევარი ჩემი გუნდი უკვე იყო და კითხვებს უსვამდნენ ფესტივალის ფინანსებთან დაკავშირებით. ჩვენი უცხოელი პარტნიორებიც იყვნენ დღეს დაკითხვაზე. რასაც მკითხავენ ყველაფერზე გავცემ პასუხს. ნებისმიერ რთულ კითხვას ვუპასუხებ. ყველანაირი დოკუმენტაცია წაიღეს არაფერი დაგვიშლია, ყველაფერი ვაქვს გამჭვირვალედ და ღიად. არსად გასაქცევი და დასამალი არაფერი არ მჭირს", - განაცხადა სიგუამ.

მისივე თქმით, Gem Fest-ის ორგანიზატორებს სახელმწიფოდან ერთი თეთრი არ აუღია.

"სახელმწიფოს ჩართულობამ იყო მცირე ნაწილში. რაშიც იყო სახელმწიფო რესურსი გადახდილი ყველაფერი შესრულებულია 100%-ით. ფესტივალი ჩატარდა თავიდან ბოლომდე. 500 არტისტმა დაუკრა. აშუქებდა მსოფლიო პრესა. ფინანსური სირთულეები შეგვექმნა, მათ შორის იყო უამინდობა. ბევრმა მეიჯარემ ვალი არ გადაგვიხადა. ფესტივალზე 350-ზე მეტი ადამიანი იყო დასაქმებული, დაახლოებით 35-მა ადამიანმა სრულად ვერ აიღო თავის გასამრჯელო და მე ვაძლევ პირობას, რომ ყველა მათგანი თანხას ბოლო თეთრამდე მიიღებს. ყველა დავალიანება და გადასახადი სახელმწიფოს წინაშე გვაქვს გადახდილი", - განუცხადა სიგუამ.

მისივე თქმით, სახელმწიფომ Gem Fest-ის მონაწილე მხოლოდ რამდენიმე არტისტს გადაუხადა ანაზღაურება.

"ჩვენ დავასრულეთ ფესტივალი ჩვენთვის საკმაოდ დიდი ზარალით, თუ ვინმე არის დაზარალებული ვარ მე და ჩვენ გვაქვს ვალები, რომელსაც ასევე არ გავურბივართ. თუმცა არ ვაპირებთ არც ერთ დავალიანებას და პრობლემას თავი ავარიდოთ. შარშან როდესაც ჩვენ დავასრულეთ ფესტივალი 2016 გვქონდა მილიონ ორასი ათასი ლარი ვალი და ყველაფერი გადავიხადეთ ბოლო თეთრამდე, იგივე არის ახლაც და ასევე გადავიხდით ბოლომდე ვალებს", - განაცხადა სიგუამ.