"პატრიოტთა ალიანსი" წინასაარჩევნო კამპანიის პარალელურად საპროტესტო აქციებს აანონსებს. პოლიტიკურმა გაერთიანებამ დღეს თბილისის მერობის კანდიდატად ირმა ინაშვილი დაასახელა.
როგორც "პატრიოტთა ალიანსში" ამბობენ, ადგილობრივი თვითმმართველობის არჩევნები პოლიტიკურ პროცესად უნდა იქცეს, რომელიც საარჩევნო სისტემის ცვლილებას მოემსახურება და სწორედ ამ მოთხოვნით სექტემბრის ბოლოდან "პატრიოტთა ალიანსი" როგორც დედაქალაქში ისე რეგიონში, საპროტესტო აქციებს დააორგანიზებს.
"ჩვენ დღეს გვაქვს ისეთი სისტემა, პატრიარქმაც რომ მიიღოს მონაწილეობა, იმასაც კი ეტყვიან, ბოკერიამ შენზე მეტი ხმები მიიღო და გაჯობაო. ასეთი სისტემა გვაქვს ჩვენ, ამიტომ არჩევნებს, რომელიც ახლა გვაქვს, არ უნდა შეხედოთ როგორც მარტო ადგილობრივი თვითმმართველობის არჩევნებს, ამას უნდა შევხედოთ, როგორც არჩევნები ქალაქისა თუ სოფლის განვითარებისა და კეთილმოწყობის კუთხით. ჩვენ უნდა ვაქციოთ ეს პროცესი პოლიტიკურ პროცესად", - განაცხადა "პატრიოტთა ალიანსის" ლიდერმა დავით თარხან-მოურავმა.
მისივე თქმით, არჩევნები ჩაივლის მასშტაბური საპროტესტო აქციების ფონზე, რომლის ორგანიზატორიც "პატრიოტთა ალიანსი" იქნება.
"საჭიროა ფიგურა, რომელმაც შეძლება, რომ პოლიტიკურ პროცესად აქციოს ეს არჩევნები და ასეთი ფიგურა არის ირმა ინაშვილი. ის იქნება ჩვენი კანდიდატი. ის არის მებრძოლი, ძალიან პრინციპული ადამიანი და ვფიქრობ, რომ სულ სხვა სულისკვეთებას შესძენს ამ არჩევნებს", - განაცხადა თარხან-მოურავმა.