გამოცდების ეროვნული ცენტრის ხელმძღვანელის, მაია მიმინოშვილის ინფორმაციით, ყველაზე მეტი განაცხადი სამართალმცოდნეობის, ბიზნესისა და საერთაშორისო ურთიერთობების მიმართულებებზე გადანაწილდა.
როგორც მაია მიმინოშვილმა აღნიშნა, სახელმწიფო უნივერსიტეტებს შორის ლიდერ პოზიციებს ჯავახიშვილისა და ილიას სასწავლებლები იკავებენ.
მისივე განმარტებით, ასევე გაიზარდა მოთხოვნა ქართული ენის მომზადების პროგრამაზე. რაც შეეხება იმ მიმართულებებს, რომლებიც სახელმწიფოს მხრიდან სრულად ფინანსდება, უფრო დიდია ინტერესი ჰუმანიტარულ მიმართულებებზე.
"გამოიკვეთა ერთი ტენდენცია, რომ დიდია ინტერესი მიმართულებებზე, რომელიც უფრო ჰუმანიტარულს განეკუთვნება, ვიდრე საბუნებისმეტყველოს და ზუსტ მეცნიერებებს. ეს ჩემი აზრით ოდნავ სამწუხაროა, როცა არ არის ინტერესი ზუსტი და საბუნებისმეტყველო მიმართულების მიმართ. თუმცა გაზრდილია ინტერესი ისტორია, ქართული ფილოლოგიის, არქეოლოგიის, ფილოსოფიის მიმართულებით", - განაცხადა მიმინოშვილმა.
მაია მიმინოშვილის განმარტებით, დღეს დაიწყო აბიტურიენტთა ნაშრომების გასწორებაც და თვის ბოლოს უკვე საბოლოო შედეგები გამოქვეყნდება.
წელს ერთიან ეროვნულ გამოცდებზე სტუდენტის სტატუსის მოსაპოვებლად 39 000-მდე აბიტურიენტი იბრძვის.