რაჭაში, მთის ჩამოშლის გამო მდინარე ლუხუნის ხეობაში ჩაკეტილი გზა დროებით გაიხსნა.
როგორც პირველი არხის ჟურნალისტი იუწყება, რამდენიმესაათიანი მუშაობის შემდეგ გზა დროებით გაიხსნა, მოძრაობენ როგორც მაღალი გამავლობის, ასევე მსუბუქი ავტომობილები. თუმცა, ადგილობრივი ხელისუფლების წარმომადგენლები ამბობენ, რომ საფრთხე დიდია, რადგან მთიდან ქვები ისევ ცვივა და შესაძლოა, მთა კვლავ ჩამოიშალოს.
გზის გაწმენდითი სამუშაოების პარალელურად, მიმდინარეობს ალტენატიული, ძველი გზის აღდგენითი სამუშაოებიც. ძველი გზა დღის ბოლომდე აღდგება, თუმცა ამ გზაზე გადაადგილებას მხოლოდ მაღალი გამავლობის ორხიდიანი მანქანები შეძლებენ.
გზასთან დაკავშირებით ინფორმაცია გაავრცელა საქართველოს საავტომობილო გზების დეპარტამენტმაც. მათი ინფორმაციით, ამბროლაურში, წესი-ურავის საავტომობილო გზაზე საღამოს 19:00 სთ-დან დილის 07:00სთ-მდე მოძრაობა იკრძალება.
ამბროლაურში მთის ჩამოშვლის გამო სამი სოფელი გარე სამყაროს არის მოწყვეტილი.