რაჭაში, ამბროლაურის მუნიციპალიტეტში გარესამყაროს სამი სოფელი მოწყდა.
მდინარე ლუხუნის ხეობაში მდებარე სოფლებთან - ლიხეთთან, აბართან და ურავთან დამაკავშირებელ გზაზე მთა ჩამოიშალა.
ამის შესახებ პირველ არხს ამბროლაურის მუნიციპალიტეტის გამგებლმა, მალხაზ ლომთაძემ განუცხადა.
სოფლებში დაახლოებით 900 ოჯახი ცხოვრობს. ჯერ უცნობია, თუ როდისთვის მოხერხდება გზის აღდგენა.
"სამწუხაროდ, არის სავალალო მდგომარეობა. ამ დროისთვის გაწმენდასაც არ ექვემდებარება ტერიტორია. შევქმენით ოპერატიული შტაბი, დავუკავშირდით გეოლოგიურ სამმართველოს. მიმდინარეობს კვლევითი სამუშაოები და ვეძებთ გამოსავალს. ცენტრალური გზიდან დაახლოებით ერთი კილომეტრის მოშორებით დიდი მთა მოწყდა და გზა გადაიკეტა. ინტენსიურად ხდება მთის ჩამოშლა, ამიტომ შეუძლებელია გაწმენდითი სამუშაოების დაწყება. არის საუბარი ალტერნატიული გზის გაკეთებაზეც. ყველაფერს გავაკეთებთ, რომ მოსახლეობას პრობლემები არ შეექმნას",-აღნიშნა ამბროლაურის გამგებელმა.