საქართველოს პირველი პრეზიდენტის ოჯახი პროკურატურას მიმართავს.
ოჯახის ადვოკატმა 5 აგვისტოს მთავარ საგამოძიებო უწყებას წერილით მიმართა, - ზვიად გამსახურდიას უფლებამონაცვლედ მისი ოჯახის წევრები გამოცხადნენ და მიეცეთ გამოძიების მასალების გაცნობის საშუალება.
ადვოკატ ამირან გიგუაშვილის განმარტებით, პასუხი პროკურატურას ამ დრომდე არ გაუცია.
ცოტნე გამსახურდიას განცხადებით, იმ შემთხვევაში თუ საქართველოს პირველი პრეზიდენტის ოჯახს დაზარალებულის უფლებამონაცვლის სტატუსს არ მიანიჭებენ, ისინი სარჩელს ადამიანის უფლებათა ევროპულ სასამართლოში შეიტანენ.
2015 წელს პროკურატურამ ზვიად გამსახურდიას საქმეს მკვლელობის კვალიფიკაცია მიანიჭა. შესაბამისად, საქმის გამოძიება გარდაცვალების, ნაცვლად, მკვლელობის საქმეზე გრძელდება.