რუსეთის საგამოძიებო კომიტეტი პოლონეთს პასუხობს. ​როგორც კომიტეტის ოფიციალური წარმომადგენელმა სევეტლანა პეტრენკომ განაცხადა, 2010 წელს სმოლენსკთან ჩამოვარდნილი თვითმფრინავის ფრთაზე აფეთქების კვალი აღმოჩენილი არ არის.

​მისივე თქმით, პოლონელმა ექსპერტებმა ჯერ კიდევ 2011 წელს დაადგინეს, რომ ლეხ კაჩინსკის თვითმფრინავის ჩამოვარდნის მიზეზი ხესთან შეჯახება იყო.

„აბსოლუტურად გაუგებარია, რას ეფუძნება პოლონელი ექსპერტების ახალი დასკვნები. კატასტროფის შემდეგ ჩატარებულმა ბალისტიკურმა ანალიზმა ლაინერზე ასაფეთქებელი ნივთიერების კვალი ვერ გამოავლინა.“ - განაცხადა პეტრენკომ.

მისივე განცხადებით, პოლონეთის ყოფილი პრეზიდენტის თვითმფრინავის ნამსხვრევები რუსეთში ინახება, თუმცა 2014 წლს შემდეგ პოლონელ ექსპერტებს ისინი არ დაუთვალიერებიათ.

პოლონეთის ხელისუფლების მიერ შექმნილი ახალი კომისია, რომელიც ტუ-154-ის ჩამოვარდნის საქმეს იძიებს, აცხადებს, რომ თვითმფრინავის ფრთის დაზიანებები აფეთქების კვალზე მიუთითებს. პოლონელი ექსპერტების თქმით, მარცხენა ფრთის დაზიანება ხესთან შეჯახებით არ არის გამოწვეული, არამედ კონსტრუქციას სავარაუდოდ, აფეთქების კვალი აღენიშნება.



პოლონეთის ლიდერის ლეხ კაჩინსკის თვითმფრინავი ტუ- 154-ი 2010 წლის აპრილში სმოლენსკში ჩამოვარდა. ბორტზე იმყოფებოდა 96 ადამიანი, ისინი კატინში დაგეგმილ სამგლოვიარო ცერემონიალზე მიემგზავრებოდნენ. კატასტროფას ცოცხალი არც ერთ მგზავრი არ გადაურჩა.