საპატრიარქოს სიწმინდეების დაცვისა და მოძიების განყოფილების უფროსი, ეპისკოპოსი ვახტანგ ახვლედიანი მიიჩნევს, რომ ზუგდიდიდან ხობში ღვთისმშობლის კვართის შესაძლო გადატანის საკითხზე წმინდა სინოდმა უნდა იმსჯელოს. ამის შესახებ განცხადება ეპისკოპოსმა ახვლედიანმა ზუგდიდისა და ცაიშის ეპარქიის მიტროპოლიტის რეზიდენციაში სასულიერო და საერო პირებთან შეხვედრის შემდეგ განაცხადა.
როგორც ეპიკსოპოსმა ახვლედიანმა აღნიშნა, მან კვართის გადატანასთან დაკავშირებით არსებული ვითარება უნდა შეისწავლოს და გააკეთოს შეჯამება.
როგორც „მოამბის“ ჟურნალისტი ადგილიდან იუწყება, შეხვედრაზე ფოთისა და ხობის ეპარქიის მიტროპოლიტის მეუფე გრიგოლის სინოდისადმი მიმართვა განიხილეს. მიმართვაში ნათქვამია, რომ ღვთისმშობლის კვართი მარიამობას ერთი დღით ხობში გადაიტანონ.
ამ მიმართვამ ზუგდიდელების უკმაყოფილება გამოიწვია. ეპისკოპოს ვახტანგ ახვლედიანს ქალაქის მერმა, მაჟორიტარმა დეპუტატმა, საზოგადოებისთვის ცნობილმა სახეებმა მიმართეს და აუხსნეს, რომ კვართი არ უნდა გაიტანონ.
ზუგდიდიდან ღვთისმშობლის კვართის გატანა რამდენჯერმე აქამდეც სცადეს, რასაც ყოველთვის მოჰყვებოდა ხოლმე მღელვარება.