წინასწარი შედეგების მიხედვით, კენიის საპრეზიდენტო არჩევნებში მოქმედი პრეზიდენტი უჰურუ კენიატა ლიდერობს - იუწყება BBC. ამ დროისთვის, დათვლილია ბიულეტენების 80 პროცენტი, რომლის შედეგადაც პრეზიდენტს ხმათა 55 პროცენტი აქვს, მის მოწინააღმდეგეს, ექსპრემიერ რაილა ოდინგას კი, მოქალაქეთა 44 პროცენტი უჭერს მხარს. თუმცა ოპოზიცია საარჩევნო კომისიის შედეგებს არ ეთანხმება და მის წევრებს დოკუმენტების გაყალბებაში ადანაშაულებს. გამარჯვებისთვის კანდიდატს ხმათა 50 პროცენტი და ქვეყნის 47 ოლქიდან მეოთხედში გამარჯვება სჭირდება. საპრეზიდენტო არჩევნების პარალელურად, ასევე მიმდინარეობს საპარლამენტო და ადგილობრივი თვითმმართველობების არჩევნებიც. ექსპერტები შიშობენ, რომ არჩევნების შედეგებს, შესაძლოა მოვლენების ისეთივე განვითარება მოჰყვეს, როგორც ეს 2007 წლის შემთხვევაში მოხდა. მაშინ მოწინააღმდეგე ძალებს შორის შეიარაღებულ დაპირისპირებას, 1400-მდე ადამიანის სიცოცხლე ემსხვერპლა, 600 ათასამდე პირი კი ლტოლვილად იქცა.