პენტაგონი სამხედრო ოპერაციის გეგმას ამზადებს, რომლის ფარგლებშიც ფილიპინებში „ისლამური სახელმწიფოს” მებრძოლთა პოზიციებზე, საჰაერო იერიშები განხორციელდება. ამის შესახებ ტელეკომპანია NBC-ი თავდაცვის უწყების ორ მაღალჩინოსანზე დაყრდნობით იუწყება.
გავრცელებული ინფორმაციით, სამხედრო ოპერაციის დაწყების გეგმა ამ ეტაპზე განხილვის პროცესშია და პენტაგონმა, შესაძლოა, მის შესახებ ოფიციალური განცხადება დღეს გააკეთოს.
სავარაუდოდ, ავიაიერიშები უპილოტო საფრენი აპარატებით განხორციელდება. პენტაგონის პრესსამსახურში აცხადებენ, რომ ვაშინგტონი ოფიციალურ მანილასთან დაზვერვის მონაცემების მიმოცვლას უკვე 15 წელია ახორციელებს.
ქვეყანაში ამჟამადაც იმყოფებიან ამერიკელი სამხედროები, რომლებიც ფილიპინების ხელისუფლებას ისლამისტების წინააღმდეგ ბრძოლაში მხარდაჭერას უწევენ.