საქართველოს პრეზიდენტმა ქვეყნის სახელის საერთაშორისო ასპარეზზე გატანისა და საქართველოს პოპულარიზაციისათვის ზაზა ფაჩულიას ღირსების ორდენი გადასცა.
გიორგი მარგველაშვილმა ქართველ კალათბურთელს მადლობა გადაუხადა ქვეყნის პოპულარიზაციაში შეტანილი წვლილისთვის და საქართველოს ნაკრებს ევრობასკეტზე წარმატება უსურვა.
"დღეს ჩვენ საქართველოს ერთ-ერთ ყველაზე წარმატებულ სპორტსმენს, ზაზა ფაჩულიას ვაჯილდოვებთ. ზაზა არის ადამიანი, რომელსაც ჩვენს ქვეყანაში უამრავი გულშემატკივარი ჰყავს. არაერთხელ გამოჩნდა ჩვენი მოქალაქეების სიყვარული ზაზას მიმართ. ზაზა არა მხოლოდ წარმატების, არამედ მოქალაქეობის მაგალითია. ის არის ადამიანი, რომელიც თავის სამშობლოს არასდროს არ ივიწყებს მაშინაც, როდესაც თბილისს წყალდიდობის შემდეგ უჭირდა და ლხინშიც, როდესაც ზაზა ქართულ კალათბურთს ეხმარება. ეს ჩემთვის განსაკუთრებით მნიშვნელოვანია. მნიშვნელოვანია წარმატება, მაგრამ ასევე მნიშვნელოვანია, როდესაც შენს წარმატებას საზოგადოებას უზიარებ. მინდა, მდლობა ვუთხრა მას პატრიოტული სულისკვეთებისთვის",-აღნიშნა საქართველოს პრეზიდენტმა.
გიორგი მარგველაშვილმა წარმატება უსურვა საქართველოს საკალათბურთო ნაკრებს, რომლის წევრებიც ზაზა ფაჩულიას დაჯილდოებას ესწრებოდნენ.
საქართველოს ნაკრების კაპიტანი საქართველოში გუშინ ჩამოვიდა და NBA-ის საჩემპიონო თასი ჩამოიტანა.
ქართველ გულშემატკივრებს საშუალება ჰქონდათ, ლარი ობრაიენის სახელობის თასი პირადად ენახათ და ფოტოები გადაეღოთ.