კურორტ „გოდერძიზე“ 80 მილიონი ლარის ღირებულების საინვესტიციო პროექტები დაიწყო. დღეს ოთხი ახალი სასტუმროს მშენებლობის საძირკვლის ჩაყრის ცერემონიას საქართველოს რეგიონული განვითარებისა და ინფრასტრუქტურის მინისტრი ზურაბ ალავიძე და აჭარის მთავრობის თავმჯდომარე ზურაბ პატარაძე დაესწრნენ.

როგორც „მოამბის“ ჟურნალისტი ადგილიდან იუწყება, ინვესტიციის შედეგად 435 ახალი განთავსების ადგილი შეიქმნება და დასაქმდება 500 ადამიანი. პარალელურად „გოდერძიზე“ უკვე მიმდინარეობს ორი მაღალი კლასის სასტუმროს მშენებლობა. საერთო ჯამში, სასტუმროებში ერთდროულად 1500 ვიზიტორის მიღება იქნება შესაძლებელი.

„ასნომრიანი სასტუმროს მშენებლობა მთავრდება. მიმდინარეობს 150-ნომრიანი სასტუმროს მშენებლობაც და პარალელურად, დღეს საფუძველი ჩავუყარეთ კიდევ ოთხ სასტუმროს. ჯამში ეს იქნება მაღალი დონის კურორტი, რომელიც წელიწადის ყველა დროს ღირსეულად მიიღებს ვიზიტორებს. მაღალმთიანი აჭარის განვითარება არის ჩვენი მთავარი პრიორიტეტი“ - განაცხადა ზურაბ პატარაძემ.

დაწყებულია 1761 მეტრი სიგრძის შიდა საკურორტო გზის მოწყობა და გამოცხადდა სათხილამურო და სწრაფი კვების ობიექტების პროექტის ტენდერი.