"ქართული მარშის" წევრის, სანდრო ბრეგაძის განცხადებით, მათი წარმომადგენლის, რამაზ გაგნიძის მიმართ უკანონო ქმედება განხორციელდა, რაც იმაში გამოიხატება, რომ მისი საცხოვრებელი ბინა facebook-ის სტატუსის გამო გაჩხრიკეს.
როგორც საზოგადოებრივს ბრეგაძემ განუცხადა, აღნიშნული ქმედება პოლიტიკური ტერორის დასაწყისია.
"მთავარ პროკურატურას მივმართეთ, რომ დამნაშავეები - ის პირები დაისაჯონ, რომლებმაც ეს პოლიტიკური გადაწყვეტილება მიიღეს და "ქართული მარშის" წინააღმდეგ პოლიტიკური ტერორი დაიწყეს. თუ პროკურატურა დამნაშავეებს უახლოეს მომავალში თავად არ გამოავლენს, მაშინ "ქართული მარში" უფლებას იტოვებს, რომ მძლავრ საპროტესტო აქციებს მიმართოს და ქვეყნის გასაგონად განაცხადოს, რომ ქვეყანაში არის არა დემოკრატიული სისტემა, არამედ პოლიტიკური ტერორი" ,- აღნიშნა ბრეგაძემ.
მისივე ცნობით, სოციალურ ქსელში გაგნიძის მიერ განთავსებული სტატუსის მსგავსი შინაარსის პოსტი, "ქართველთა მარშის" დაახლოებით 500-მდე აქტივისტმა დადო.
"თუ სისხლის სამართლის საქმე მის წინააღმდეგ აღძრეს და მის სახლში ჩხრეკა ჩაატარეს, ჩვენ ვითხოვთ, რომ 500 ჩხრეკა ჩაატარონ და სისხლის სამართლის საქმე 500 ადამიანზე აღძრან, რაც არის მაჰადმა განდისა და სოლიდარობის გზა. უკან ერთი ნაბიჯით კი, არ დავიხევთ", - განაცხადა ბრეგაძემ.
"ქართული მარშის" წარმომადგენლებმა შესაბამისი წერილი მთავარ პროკურატურაში დღეს წარადგინეს.
რამაზ გაგნიძის განცხადებით, მისი სტატუსი მუსლიმ კრიმინალ-ტერორისტებს ეხებოდა.