პოლონეთის ევროპული მომავალი კითხვის ნიშნის ქვეშ დგას, - ამის შესახებ ქვეყნის ექსპრემიერმა და ამჟამად ევროპული საბჭოს პრეზიდენტმა დონალდ ტუსკმა განაცხადა.
მისი თქმით, ის იმ პირთა რიცხვს განეკუთვნება, ვინც პოლონეთის „ევროპულ გზაზეა” პასუხისმგებელი და აღნიშნავს, რომ ქვეყანაში ამჟამად ძალიან ცუდი მოვლენები ხდება.
დონალდ ტუსკი ასევე არ გამორიცხავს, რომ პოლონეთის პოლიტიკურ ცხოვრებაში საპრეზიდენტო არჩევნების დროს დაბრუნდეს, თუმცა ამ ეტაპზე ზუსტი პასუხი არ აქვს.
პოლონეთის პრეზიდენტმა ანჟეი დუდამ 31 ივლისს ვეტო დაადო სასამართლო რეფორმის შესახებ 2 კანონს, რომლის მიღების წინააღმდეგაც ქვეყანაში მასობრივი საპროტესტო აქციები მიმდინარეობდა. ახლა ორივე დოკუმენტი სეიმში განმეორებით გადაიგზავნა.
პრეზიდენტის თქმით, ქვეყანაში რეფორმა აუცილებელია, თუმცა ეს საზოგადოებისა და სახელმწიფოს დაყოფის ხარჯზე არ უნდა მოხდეს.
სასამართლოების შესახებ კანონის გამოქვეყნების შემდეგ, რომელიც ევროკავშირის კანონმდებლობას ეწინააღმდეგება, ევროკომისიამ სანქციების დასაწესებლად პროცედურა დაიწყო და ოფიციალური ვარშავა ევროპის საბჭოში ხმის ჩამორთმევის შესახებ გააფრთხილა, იმ შემთხვევაში თუ ხელისუფლება უზენაესი სასამართლოს მოსამართლეებს დაითხოვს.
პრობლემის მოსაგვარებლად ბრიუსელმა ვარშავას ერთთვიანი ვადა მისცა.